Ofrece vistas panorámicas do océano e da Ría, pasando por praias, enseadas e o Cemiterio dos Ingleses.

O PR- G 158 é un percorrido homologado circular que ten como punto de inicio e final o Castelo do Soberano. Cunha lonxitude total de 21,8 Km, transcorre bordeando a costa na súa primeira metade e realiza a volta polo interior. Na primeira metade do percorrido pasaremos por praias, enseadas e cantís contemplando a bravura do océano. A segunda discorre pola montaña, dende onde gozaremos da serenidade das vistas da Ría de Camariñas. O repertorio de vistas panorámicas é constante; a só 2 km do inicio, tomando a derivación á ermida da Virxe do Monte, temos a primeira: a Ría de Camariñas e o Cabo Vilán. Poderemos contemplar a pintoresca contorna do cabo dende diferentes perspectivas durante varios quilómetros. A partir do Cemiterio dos Ingleses, onde descansan os náufragos do buque británico Serpent, o sendeiro pasa da costa ao interior. Nesta parte do percorrido chaman a atención as singulares formacións rochosas nas que descubriremos curiosas semellanzas. Na parte máis elevada da ruta, o miradoiro do Monte das Seixas, veremos con só volver a cabeza unha magnífica estampa da desembocadura do río Grande, da Ría de Camariñas e do Cabo Vilán. Chegando a Camariñas atravesaremos terras cultivadas e pequenas aldeas nas que destacan os particulares hórreos desta zona.